08 Јуни

[Davor_B]

632 - Во Медина умре Мухамед, основач на исламот, според муслиманското верување - „последниот пророк“. Во 40-тата година почна да проповеда нова вера со еден бог, но во почетокот имаше малку приврзаници. Бидејќи не успеа во Мека, по 10 години отиде во Талф, а подоцна во Медина, каде што ја основа првата општина на нови верници. Роден е на 20.04.571 година.


1810 - Роден е Роберт Шуман, германски композитор и музички писател, еден од најзначајните претставници на романтизмот во музиката. Во своите дела внесе лиричност и интензивност во доживувањата. Особено се истакнува како автор на клавирски минијатури и на соло песни, а компонира и камерна и сценска музика. Компонира четири симфонии и една опера. Умре на 29.07.1856 година.


1883 - Франција воспостави целосна контрола над Тунис, нејзин протекторат од 1881 година.


1904 - Во Есен е основан Круповиот концерн, до крајот на Втората светска војна еден од најголемите германски металургиски монополи, наменет за производство на воен материјал. Концернот е ликвидиран со законите на сојузничката окупациска управа. Меѓутоа, Александар Круп, по излегувањето од затворот во 1951 година, го реконструира, па тој во последно време е еден од водечките концерни во германската металургија.


1942 - Јапонската подморница во Втората светска војна го бомбардира австралискиот град Сиднеј.


1973 - Фашистичкиот диктатор во Шпанија, Франциско Франко му го предаде местото премиер на адмирал Луис Кареро Бланко. Франко остана на функцијата шеф на државата.


1986 - Наспроти обвинувањата за злосторства, кои како нацистички офицер ги изврши во Втората светска војна во Југославија и Грција, поранешниот генерален секретар на Обединетите нации Курт Валдхајм е избран за претседател на Австрија.


1905 - Во Велес е роден Стефан Гајдов, композитор, диригент и педагог од првата генерација македонски музички дејци. Почина во Скопје на 17 јули 1992 година.


1991 - Официјално е соопштено дека во Заливската војна загинале 100.000 Ирачани и 203 војници на меѓународните сили, од кои 144 беа Американци.