Том Кејси: Нимиц достави нов предлог за надминување на разликите за името меѓу Македонија и Грција

[WondeR]

Вашингтон, 8 јануари (МИА) - Посредникот на ОН за спорот околу името на Македонија меѓу Скопје и Атина, Метју Нимиц, достави нов предлог за надминување на разликите, изјави синоќа портпаролот на Стејт департментот, Том Кејси.
- Се надеваме дека тој може да биде основа за постигнување договор меѓу двете страни, нагласи Кејси, додавајќи оти САД ќе го поддржат секој договор што ќе биде прифатлив за двете земји.
Кејси потенцира дека САД разбираат оти спорот предизвикува големи емоции и во Македонија и ви Грција, но дека е најважно преговарачкиот процес да продолжи.
Атинскиот весник „Етнос“ во денешното издание наведува дека најавата на Кејси дека Нимиц доставил нов предлог за надминување на спорот, не е потврдена од ОН.
Весникот пренесува изјава на извор во грчката дипломатска мисија во ОН, кој вели дека „до Атина не стигнал нов предлог“.
Се претпоставува дека новиот предлог на Нимиц ќе им биде доставен на двете страни на 19 февруари, за кога е предвидена средба на амбасадорите на двете земји, наведува „Етнос“.
Весникот, повикувајќи се дипломатски извори, тврди дека „новиот предлог на Нимиц нема да ја израдува Атина“. Според истите извори, Нимиц не го прифатил предлогот на Грција за сложено име, но го прифатил ставот на Македонија дека земјата има право да го користи своето уставно име.