Тадиќ: Договорот за демаркација меѓу Македонија и Косово за нас е неважечки

[barba]

Нема дилеми дека ние сме подготвени да учествуваме во процесот на демаркација на границата, им изјави Тадиќ на новинарите денеска во Охрид




Српскиот претседател Борис Тадиќ денеска во Охрид изјави дека се што Косово договара со Македонија во однос на границата, за Србија е неважечко.
- Тоа е проблем за Македонија, но Србија нема да отстапи од својот став - изјави Тадиќ.
На новинарско прашање дали отпочнувањето на разговорите за демаркација на границата помеѓу Косово и Македонија значи дека Македонија се меша во неговиот мандат, Борис Тадиќ одговори дека за тоа нема никакви дилеми.
Тој додаде дека Србија е волна да го реши прашањето со границата и да има свои претставници во тој процес.

- Нема никакви дилеми. Јас сум претседател на Србија во која влегува и Косово со Метохија. Србија е земја која има меѓународно признати граници, и како таква е членка на ОН. Ние сме подготвени да го решиме тој проблем, и немаме проблем да пратиме свој претставник на преговори – изјави Тадиќ.

Тој појасни дека нема никаква лоша намера кон Македонија, односно дека Србија има пријателски односи кон земјава, но дека во тоа прашање не се работи за Макединија туку во заштитата на суверенитетот на Србија, и доколку со добра волја ние би се ставиле во позицијата на Србија, верува дека исто би се однесувале.

Попладнево претседателот Бранко Црвенковски оствари билатерална средба со српскиот претседател Тадиќ, на која Црвенковски му го пренел ставот на Македонија во однос на прашањето за демаркација на границата, и се повикал на постоечките аргументи. Исто така било укажано дека демаркацијата е технички, а не политички процес.