Шврговски се подготвува да соопшти детали за атентатот врз Глигоров

[barba]

Љупчо Шврговски, државниот јавен обвинител, во вторник на прес-конференција ќе соопшти што открила истрагата по изјавата на анонимниот сведок за атентатот на поранешниот претседател Киро Глигоров. Пред еден месец Љубомир Фрчкоски во своја колумна објави дека постои сведок за атентатот врз Глигоров. Според него, наводно сведокот го информирал оти тој ја направил спорната фотографија на автомобилот бомба „ами 8“, и дека знаел кој бил купувачот на автомобилот. Фрчкоски исто така напиша дека сведокот го информирал дека зад атентатот стоеле структури на Управата за безбедност и разузнавање. Една недела по објавувањето на неговата колумна, државниот јавен обвинител Шврговски го повика Фрчкоски на разговор, по што овој му го соопшти името на сведокот. Анонимниот сведок беше повикан во обвинителството каде дал и изјава за информациите за атентатот. По ова, Шврговски побара од МВР да ги испита наводите на информаторот.

Се очекува на прес-конференцијата за која е најавено дека ќе се одржи во вторник, обвинителот Шврговски да соопшти дали по информациите на сведокот се откриени нови сознанија за атентатот.

Атентатот врз поранешниот претседател Киро Глигоров беше извршен во 1995 година, кога во близина на скопскиот хотел „Бристол“ експлодира автомобил бомба во моментите додека претседателскиот автомобил се движеше кон Собранието. Глигоров беше тешко повреден и го загуби едното око, а загинаа неговиот шофер Александар Спировски и случајниот минувач Христо Христов. Полесно беа ранети телохранителот на Глигоров и уште неколку минувачи.




Шврговски го прослави 48-от роденден - „Џино“ полно со обвинители

Јавното обвинителство вчера околу 14 часот се испразни, а работниот ден за македонските обвинители беше краток.

Со бело вино и мешана салата државниот јавен обвинител Љупчо Шврговски во текот на работното време со своите колеги го славеше својот 48-ми роденден во скопскиот ресторан „Џино“. Со десетина колеги од обвинителствата, некои од скопското, а дел од обвинителството за борба против организиран криминал, Шврговски го прослави својот роденден во опуштена атмосфера. Јавниот обвинител вчера беше славенички расположен - од колегите доби убаво спакувани подароци и не правеше проблеми и кога го прашавме дали може да го фотографираме.