Русија ја подржува Македонија за признавање на нејзиното уставно име

[WondeR]

Русија и натаму ќе ја поддржува Македонија во однос на признавањето на нејзиното уставно име и неговото постојано користење, изјави министерот за надворешни работи Антонио Милошоски по денешната средба со шефот на руската дипломатија Сергеј Лавров во Астана, главниот град на Казахстан.
- Оваа политика очекуваме, и ни беше дадено уверување, дека ќе продолжи да биде принцип на Руската федерација и во следниот период, рече Милошоски. Тој, го информирал Лавров за признавањето на Косово од македонска страна.
- Нашето објаснување беше дека тоа е одлука што би ја донела секоја држава доколку би била во позицијата во која се наоѓаме ние, и етнички, и географски и политички, истакна Милошоски.
Лавров на тоа напоменал дека признавањето на Косово е одлука на суверена држава и нејзина самостојна проценка како треба да постапува во такви ситуации.
Во текот на разговорите, двајцата министри се согласиле дека Македонија и Русија треба да ја интензивираат соработката, посебно на економски план. Заеднички било констатирано и дека постои добра пријателска клима меѓу двете земји која треба да се искористи, не само за средби на министерско, туку и за што почести и повисоки посети на претседателско и премиерско ниво.
- Економската соработка засега е скромна. Изразивме желба руските компании, особено од областа на енергетиката, да ги разгледаат можностите што ги нуди Македонија, но и плановите на македонската Влада за проширување на гасоводната мрежа, рече шефот на дипломатијата.
Тој оцени дека од руска страна има подготвеност за стапување во директен дијалог и за разгледување на македонските инвестициски можности.
На средбата, Милошоски го покренал и прашањето за подмирување на Клириншкиот долг меѓу Македонија и Русија кое, како што рече, се очекува да биде решено во следните неколку месеци. - Нашите влади веќе разговараат и очекуваме следните месеци да постигнеме решение што ќе го затвори ова прашање, рече министерот.
Во текот на разговорите станало збор и за прашањата од највисок интерес за Русија – состојбите со Грузија, Абхазија и Јужна Осетија.
Милошоски и Лавров учествуваат на министерската конференција на западните и муслиманските земји „Заеднички свет: Прогрес низ различности“ во Астана, чија цел е да се поттикне глобалниот дијалог заради надминување на цивилизациските разлики.
На утрешната, прва сесија, шефот на македонската дипломатија ќе има обраќање, а попладне треба да се сретне со домаќинот на Конференцијата, министерот за надворешни работи на Казахстан, Марат Тажин.