Оли Рен на прес-конференцијата по средбата, потврди дека Македонија има направено најмногу од земјите од регионот

[barba]

ЕВРОКОМЕСАРОТ ОЛИ РЕН СО ОЦЕНКА
МАКЕДОНИЈА НАПРЕДУВА ВО ИСПОЛНУВАЊЕТО НА ПОСТАВЕНИТЕ КРИТЕРИУМИ ЗА ЕУ
Еврокомесарот за проширување Оли Рен по денешната средба во Брисел со македонскиот вицепремиер за европски прашања Ивица Боцевски и шефот на дипломатијата Антонио Милошоски, истакна дека Македонија има направено напредок во исполнувањето на поставените услови за почеток на преговорите за членство во ЕУ.

Еврокомесарот Оли Рен на прес-конференцијата по средбата, потврди дека Македонија има направено најмногу од земјите од регионот за визна либерализација, пред се со биометриските пасоши, функционален, национален визен систем, интегрирана гранична контрола и борбата со трговијата со луѓе, организираниот криминал и корупцијата, и оти македонските граѓани наскоро ќе можат да патуваат во ЕУ без визи.

Рен со Боцевски и Милошоски, јави известувачот на МИА, разговарал и за политичкиот дијалог, кохабитацијата и подготвеноста на сите институции за заедничко работење во процесот на евроинтегрирањето.

Вицепремиерот Боцевски истакна дека Македонија има реализирано 75 проценти од осумте предуслови што ги доби од Европската комисија за одредување датум за почнување на преговорите со ЕУ. Тој наведе дека под политички дијалог се мисли на изборните насилства и за кохабитацијата меѓу претседателот и премиерот.

Веќе 70 луѓе се изведени пред судските органи поради изборните насилства, додека кохабитацијата, како што рече е демократски процес. Боцевски нагласи дека за евроинтегративните процеси во Македонија има целосен консензус.

На средбата со Рен не се разговарало за спорот со името. Одговорајќи на новинарско прашање македонскиот вицепремиер за европски прашања, рече дека Македонија активно учествува во процесот за изнаоѓање на решение за наметнатиот спор со името. Потврда за тоа, како што подвлече, е неодманешната посета на посредникот на ОН во спорот за името Метју Нимиц кој во Македонија беше примен на највисоко политичко ниво и во главниот град, а во Грција беше примен во Солун и на најниско ниво.

Претходно, Боцевски и Милошоски се сретнаа со потпретседателот на Европската комисија Жак Баро. На средбата главна тема беше визната либерализација. Според Баро, Македонија предничи меѓу државите од регионот во процесот на визна либерализација, а во извештаите на ЕК не е рангирана како ризична земја. Тој истакна дека Македонија може да очекува визна либерализација во 2009 година.

Баро се интересирал и за реформите во полицијата, во судството и за борбата со корупцијата.

Боцевски и Милошоски попладнево имаат работен ручек со амбасадорите на земјите членки на ЕУ по што ќе се сретнат и со генералниот директор на Директоратот за проширување Мајкл Ли, како и со неколкумина европратеници. Вечер ќе присуствуваат на свеченото отворање на просториите на Мисијата на Република Македонија при ЕУ.

Престојот во Брисел ќе го закружат утре со средби со европраламентраци и со обраќање на вицепремиерот Ивица Боцевски во Центарот за европски политики.