„Нема да дозволам Загреб да стане Бејрут“

[barba]

Хрватскиот премиер Иво Санадер разговараше со државните претставници за безбедност за начинот на кој владата во Загреб треба да одговори на вчерашното убиство на еден од најистакнатите новинари во земјата.
Тој изјави дека е решен да не дозволи уште едно убиство во мафијашки стил да биде пречка во еворпските амбиции на земјата.
Санадер го осуди нападот и рече дека нема да дозволи Загреб да стане „уште еден Бејрут".
Главниот и одговорен уредник на неделниот весник Национал Иво Пуканиќ, беше убиен со бомба подметната во неговиот автомобил.
Заедно со 47-годишниот новинар загина и шефот на маркетингот на весникот Нико Фрањиќ.
Весникот Национал има истражувачка политика и често пишува за корупцијата и за нарушувањето на човековите права.
Засега нема наводи за тоа кој би можел да стои зад нападот кој се случи вчера вечер, наводно со бомба подметната под „Лексусот“ на Пуканиќ.
Претседателот Стјепан Месиќ рече дека „тероризмот стана факт на улиците на нашиот главен град“.
Дописниците велат дека овој инцидент е само најновиот во бранот насилства во Загреб годинава, поврзани со организираниот криминал.
Најпрвин со истрели во главата беше убиена ќерката на истакнат загребски адвокат, потоа еден успешен бизнисмен, а сега и основачот на неделникот Национал.
Игор Алборгети, главен и одговорен уредник на Глобус, не е изненаде од случувањата во земја која со едната нога е веќе во Европската Унија.
„Па за нас кои се занимаваме со новинарство и кои ги следиме случувањата во организираниот криминал во Хрватска, не е изненадувачки. Но жестината и бруталноста на овие убиства покажуваат дека Хрватска влезе во една извонредно опасна фаза. Би рекол не само сигурносно, туку и во фаза на политичка дестабилизација, на која владата мора да одговори на најефикасен и најбрз можен начин."
БиБиСи: Што може да биде причина за ваквата брутолнаст и зачестеност на убиствата?
„Тешко е во овој момент да се каже кои се извршителите и причините за сето ова што се случи. Но јасен е потписот на многу вешти и обучени професионалци кои ги извршија овие убиства. Затоа може да се заклучи дека се работи за платени, нарачани и добро целени убиства, при што не можеме да ја знаеме вистинската причина за нивната ликвидација."
БиБиСи: Може ли хрватската држава да се справи со овие случаи?
„Судејќи по досегашните искуства и низата мафијашки ликвидации кои во Хрватска се случуваа од 1991-та кои не беа расветлени, би рекол дека не можеме да очекуваме многу од полициската истрага и од безбедносните служби во Хрватска, бидејќи де факто, ниту еден од извршителите, а особено нарачателите, не е откриен до ден денешен. А некои убиства се случија уште на почетокот од деведесетитте години", вели Игор Алборгети за БиБиСи на македонски.