Месиќ: Македонија е реалност која треба да се прифати

[barba]

Македонија заслужи да ја добие таа покана, бидејќи мислам дека не е добро да им се робува на некои историски теми


Хрватскиот претседател, Стипе Месиќ, во интервју за Македонското радио – Радио Скопје, изјави дека жали што Македонија не ја доби заслужената покана за членство во НАТО.
- Мене ми е жал што во тоа не успеа и Македонија, што јасно не е добро. Македонија заслужи да ја добие таа покана, бидејќи мислам дека не е добро да им се робува на некои историски теми. Тоа се нови реалности, треба да се знае стариот век да му се остави на стариот, средниот да му се остави на средниот век, а ние сега живееме во други односи, во други реалности. Мислам дека сите би требало да се свесни за ова, а Македонија едноставно е една реалност која треба да се прифати – вели Месиќ во интервјуто.

Тој понатаму, во својата оценка на ситуацијата во регионот и во коментарот за шансите на овој дел од Европа во догледно време да се интегрира во НАТО и во Европската унија, вели дека само обединета Европа може да биде фактор на мирот кога ќе се отворат границите, кога националните малцинства ќе бидат мостови на соработка, кога Европа ќе има компатибилна законска регулатива, кога ќе биде сосема сеедно дали човек живее на едната или на другата страна од границата, кога ќе има слободно движење на капитал и луѓе.

- Значи, во цела Европа има исти правила на игра. Таквата Европа ќе ја исклучи војната како политичко средство и затоа е важно за Европа да го забрза влегувањето на овој регион, на овој наш регион, кој често беше прогласуван како буре барут. Но, никогаш веќе во овој регион нема да има барут, никогаш нема да има војна, бидејќи токму здружена Европа сето тоа го исклучува – вели Месиќ.

Тој најавува дека Хрватска сака да ги заврши преговорите со ЕУ до крајот на наредната година.