Малите трговци стравуваат дека има криза за масло за јадење, производителите смируваат

[WondeR]

Малите трговци стравуваат дека ќе престанат да продаваат масло за јадење, доколку Владата навреме не ги даде потребните субвенции на производителите. Велат можно е во наредениот период да се појави криза за зејтин. Рафтовите во помалите продавници се празни, масло за јадење речиси и да нема или пак резервите што ги имаат набавувачите им го продаваат по високи цени. Дел од трговци тврдат и дека тешко се набавувало од производителите оти и тие ги чувале резервите во очекување на евентуално нови цени на суровото масло на светските берзи.

- Не можам да набавам зејтин. Продавам само на Брилијант, Кристал нема оти фабриката во Велес не работи – вели еден трговец.
- Не продавам зејтин оти набавувачите ми го продаваат по високи цени јас колку маржа да ставам? – додава друг.

Домашните производители смируваат. Од Брилијант велат производството тече редовно, компанијата имала резерви да го покрие домашниот пазар. Велешка Маслодајна пак поради недостаток на суровина скоро еден месец не произведува зејтин. Тие ќе го чекале суровото масло што Владата им го вети по пониски цени.

- Има масло за јадење ние дури извезуваме во Косово и Албанија – изјавува Златко Михајлов од Брилијант.

Од Владата порачуваат - производителите да се стрпат. Ветеното суров масло ќе им биде испорачано или викендов или наредната недела. За да го ублажи ценовниот шок Владата се договори со производителите на масло за јадење, цената да не ја зголемуваат -за возврат ќе добијат пониски цени од 20% за сурово масло за производство. Сегашната цена се движи од 85 па се до 100 денари за литар зејтин.