Македонија и Кувајт меѓусебно ќе си ги заштитуваат инвестициите

[barba]

Министерот за финансии Трајко Славески и амбасадорот на Кувајт Абдулах Ал Дуњаикик денеска потпишаа договор за поттикнување и заемна заштита на инвестициите





Поттикнување и заштита на взаемните инвестиции е целта на денешното потпишување на договорот меѓу Македонија и Кувајт.
Министерот за финансии Трајко Славески и амбасадорот на Кувајт Абдулах Ал Дуњаикик оценија дека со потпишувањето на договорот се создава правна основа и прв чекор во привлекувањето инвестиции од заинтересираните кувајтски инвеститори во Република Македонија.

- Потпишувањето на овој договор е во насока на правната заштита на инвестициите направени од инвеститорите на едната договорна страна на територијата на другата договорна страна. Со одредбите на овој договор, двете страни се обврзуваат дека на инвеститорите од другата страна ќе им доделат третман кој не е помалку поволен од третманот што им се дава на сопствените инвеститори - се вели во соопштението од Министерството за финансии.

Договорот, како што соопшти Министерството, го регулира и начинот на решавање евентуални настанати спорови меѓу инвеститор и договорна страна или спорови меѓу двете договорни страни. Договорот ќе важи 20 години, по што тој останува во сила, освен ако која било договорна страна ја извести другата дека намерава да го откаже.