Лоши сценарија за регионот по признавањето на Косово

[WondeR]

По прогласувањето независност Косово станува европска Палестина која ќе продуцира нестабилност и нови кризни ситуации во регионот, смета професорот Љубомир Цуцуловски. На денешната трибина организирана од демократската партија на Србите во Македонија, прогнозираше дека новата ситуација ќе ги мотивира Албанците кои живеат во повеќе балкански земји да бараат да се обединат во една албанска држава:

- Немале да се обединуваат. Не сакале сите Албанци во една држава. Тоа се само приказни, кои се нелогични. Како што беше нелогично постоењето на две Германии или на два Виетнама, а беше логично тие да се спојат, така логички ќе биде трите или четирите албански држави, зависи што ќе се случи во Грција, да се спојат. Тоа значи уништување на Македонија.

И професорката Билјана Ванковска размислува слично – вели дека со прекршувањето на меѓународното право и одделувањето на Косово од Србија, давањето на право на Албанците за ексклузивност на самоопределување се заговара постоење на чисти етнички држави на Балканот. Веќе се случува поделба на Косово и со овој чекор регионот и Македонија влегуваат во нов циклус на нестабилност- вели Ванковска.

- Македонија стана би-национална држава и станува. И со Косово и без него, прогнозирам дека наскоро на маса ќе биде ставено прашањето за формална федерализација на земјата. Тоа е само прашање на време - додава таа.

Смета дека Македонија ќе ги покаже сите атрибути на слаба држава и ќе го признае Косово по диктат на Вашингтон и Брисел. Ова прашање ќе ја подели домашната јавност, предвидува лидерот на македонските Срби Стоиљковиќ:

- РМ во овој момент треба да бира дали да го почитува меѓународното право или да ги прифати уцените на САД, како стратешки партнер.

Додека во домот на АРМ се одржуваше трибината во организација на партијата на Стоиљковиќ, објектот го обезбедуваа поголем број полицајци.