Името централна тема на меѓународна конференција во Атина

[WondeR]

Името се наметнало како централна тема на денешната меѓународна конференција во Атина – Балканот, сегашност и иднина, во организација на влијателниот “Дипломаси магазин”. Настапот на македонскиот амбасадор во Грција Благој Ханџиски предизвикал серија прашања и реакции од присутните во салата. Ханџиски реагирал на тоа што првично бил поканет под кратенката Македонија, за подоцна организаторите да го употребат целосното привремено име – Поранешна Југословенска Република Македонија.

- Јас сум амбасадор на Република Македонија – држава призната од Хеленската Република под привременото име Поранешна Југословенска Република Македонија. Никогаш не сум одбил покана под привременото име и покрај неговата навредливост - изјави Ханџиски.

Во настапот, Ханџиски рекол дека Македонија дала основа, но дека Грција одбила да се согласи со влез на земјава во НАТО. Зборувал за македонскиот идентитет, јазик и култура. Грчката министерка Бакојани, која исто така учествуваше на конференцијата, повторно повика на решение:

- Бараме решение кое е заеднички прифатливо и изводливо. Бараме решение кое е дефинитивно, функционално и изводливо во секој аспект. Веруваме во моќта на дијалогот, во звучноста на она што го велиме, во големината на нашите принципи. Ќе продолжиме со напорите во овие преговори со несмален интерес, бидејќи безбедноста, напредокот и просперитетот на Балканот е голема визија.

Претходно, во интервју за денешното издание на весникот “Та неа”, Бакојани изјавила дека се надева на решение на името до декември. Во спротивно, Грција ќе стави вето и за датумот за преговори со Европската Унија. На овие закани од Бакојани, реагираше портпаролот на македонската влада.

- Името Македонија нам ни е оставштина од нашите предци и тоа е име кое како оставштина ќе го оставиме за идните генерации. Во тој смисол ова е национално прашање за Македонците и Македонија и кога станува збор за него јасен е нашиот одговор - рече Боцевски.

Најновата македонско-грчка полемика доаѓа во пресрет на посетата на посредникот Метју Нимиц на Скопје и Атина в четврток и петок. Нимиц не носи нов предлог, туку е во мисија да го тестира расположението кај двете страни за продолжување на преговорите.