Грција го купи „Сенки“ на Милчо Манчевски за киноприкажување

[WondeR]

"Севн груп", една од најголемите грчки медиумски групации, на изминатото „Берлинале“ го купи филмот „Сенки“ на македонскиот режисер Милчо Манчевски, објави светскиот дистрибутер "Баварија филм интернешнл". После "Пред дождот", "Сенки" е вториот македонски филм што воопшто ќе се прикажува во грчките кина.
"Сенки" во Грција доаѓа во екот на официјалната антимакедонска кампања за промена на уставното име на Република Македонија и заканите за вето за нејзиниот прием во НАТО.
- Изненадувачки е што Грција го купи "Сенки" и покрај тоа што во филмот имплицитно се споменува егзодусот на Македонците од Егејска Македонија, наведуваат од Сенка филм. Историскиот контекст на егзодусот на Егејците е детално објаснет во пропагандните материјали на "Баварија", а досега е споменуван и во сите рецензии за филмот што излегоа во светот, велат од „Сенка филм“.
На Берлинскиот фестивал "Сенки" е продаден за киноприкажување и во Руската федерација и во Мексико.
Фестивалскиот поход на "Сенки" продолжува следниов викенд со белградски ФЕСТ, каде ќе има и ретроспектива на Манчевски, па Софија, Истанбул, Гвадалахара, Копенхаген, Сингапур и Брисел. По тримесечно прикажување во Скопје и рекорден број гледачи, "Сенки" се уште игра низ кината во Македонија.