Грабеж со безбол палки пред „Вил Хил“

[barba]

Грабеж со безбол палки пред „Вил Хил“
недела, 06 април 2008
Непознати лица утрово го нападнале обезбедувањето, го одзеле дневниот промет и побегнале со возилото на кладилницата




Утрово во 10 и 30 часот, непознати лица со безбол палки го нападнале обезбедувањето на обложувалницата „Вил Хил“ и го одзеле дневниот промет. Крадците ги нападнале М. С. и Б. Б. кога тие ги земале парите од објектот во Карпош за да ги пренесат на друго место. По нападот, крадците веднаш побегнале со службениот автомобил на „Вил Хил“, тико во светла боја.
Неофицијално дознавме дека еден од нападнатите бил поранешен командир на специјалните единици при МВР, па затоа и полицијата реагирала експресно. По неполн половина час од грабежот, возилото со кое крадците побегнале било најдено напуштено во близина на ресторанот „Балканика“.

Според очевидци кои сакаат да останат анонимни, едниот напаѓач стоел пред обложувалницата. Тој имал околу 35 години, носел мантил и капа и не делувал сомнително. Кога обезбедувањето излегло, крадецот ги почекал да стигнат до службениот автомобил паркиран на пешачкиот остров, а потоа веднаш ги нападнал. Во тој момент дотрчал и другиот напаѓач и почнале да ги удираат обезбедувачите со безбол палки.

Обезбедувачот Б.Б. поради здобиените повреди веднаш бил пренесен во Ургентниот центар. Од полицијата не соопштија за колкава сума станува збор. Од таму се сомневаат дека можно е да има уште еден напаѓач.