Четири години од загинувањето на претседателот Борис Трајковски

[WondeR]

Денеска се навршуваат четири години од авионската несреќа во која загинаа претседателот Борис Трајковски и осуммина негови соработници и членови на екипажот. Владиниот „Кингер“ со кој претседателот Трајковски патуваше на Меѓународна конференција за инвестирање во Босна и Херцеговина, на 26 февруари 2004 година се урна во атарот на Матиќ Брдо кај селото Хусковиќи во близина на Мостар. Авионот требаше да слета на мостарскиот аеродром во осум часот по локално време. Остатоците беа пронајдени 24 часа по паѓањето на авионот.
Едногодишната истрага што ја водеа надлежните македонски и босански органи покажа дека причина за уривањето се пропусти на екипажот направени во процедурата за приоѓање на аеродромот Мостар во услови на сложена метеоролошка состојба, густа магла и облачност. Пропустите биле во тоа што екипажот отстапил од процедурата за слетување, откако претходно ја известил контролата на летање дека ја прифаќа процедурата и дека врши полна процедура при слетувањето.
Министерството за внатрешни работи побара од Јавното обвинителство да се отвори повторно истрага за несреќата што беше одбиено со образложение дека одлуката е донесена врз основа на грижлива, совесна и сеопфатна анализа на комплетниот прибавен доказен материјал непосредно по падот на авионот и оти нема нови докази за повторување на истрагата.
Министерката Гордана Јанкулоска вчера изјави дека не ја отфрла можноста за повторно отворање на истрагата за допрецизирање на причините за авионската несреќа.
- Не ја отфрламе можноста за отворање на истрагата, напротив, секој дополнителен доказ, секоја дополнителна информација многу сериозно ќе ја разгледаме се со цел конечно овој случај да добие завршница, во смисла да се дознае вистината и да имаме јасна слика што се случи со авионот, изјави Јанкулоска.
Таа посочи дека Министерството за внатрешни работи во континуитет ги разгледува сите сознанија во врска со несреќата.
Повторно покренување истрага побара и швајцарскиот европратеник Андреас Грос, личен пријател на трагично загинатиот претседател.
Во несреќата, покрај Трајковски животот го загубија Димка Илкова-Бошковиќ, Ристо Блажевски и Анита Кришан Лозановска од Кабинетот на претседателот, Миле Крстевски од Министерство за надворешни работи, Борис Велинов и Аце Божиновски членови на обезбедувањето и пилотите Марко Марковски и Бранко Ивановски.
На местото на несреќата една година по паѓањето на авионот беше откриено спомен обележје. Пред споменикот денеска ќе биде одржана комеморативна церемонија на која ќе присуствуваат претставници на Амбасадата на Македонија во Босна и Херцеговина, на босанските власти и други делегации.