Во Македонија откриен најстариот жител на Балканот

[Jakov]

Откриен е најстариот неолитски човек на Балканот и најстариот жител на Македонија. Славе од неолитот, како што го нарекоа археолозите, живеел 7.000 години пред нашата ера.
„Ако се земе во предвид дека населбата е една од најстарите на Балканот и ова е погребување во една најстара населба, најнормално дека тоа е најстариот човек на овој простор“, изјави Трајанка Јовчевска, археолог.
Скелетот е откриен на археолошкиот локалитет Грнчарица, кај село Крупиште. Пронајден е во типична положба за погребувањата во периодот на неолитот.
„Погребаниот е поставен на левата страна во една згрчена положба, нозете му се високо до черепот, рацете исто така собрани“, рече Јовчевска.
Археолозите што работат на ископувањата на овој локалитет веќе му дадоа име на најстариот жител, и покрај тоа што се уште не е направена антрополошката анализа, за да се утврди со сигурност дали се работи за маж или за жена.
„Кога го извадивме погребаниот и го сместивме во кутија и кога се вративме назад, на кутијата одозгора пишуваше Славе“, додаде Трајанка Јовчевска.
Најстарата неолитска населба во Македонија, Грнчарица, беше откриена сосема случајно минатата година од тимот на археолози што работат на локалитетите покрај цевководот на хидросистемот Злетовица.