Чедомир Јаневски нов тренер на Црвена Ѕвезда

[barba]

Македонскиот фудбалски стручњак Чедомир Јаневски потпиша едногодишен договор со најтрофејниот српски клуб Црвена Ѕвезда.

Како што пренесуваат српските медиуми, Јаневски договорот со раководството на Црвена Ѕвезда го потпишал во понеделникот преку факс, поради неможноста веднаш да пристигне од Дубаи за Белград.
Според најавите, предвидено е Јаневски денеска попладне да допатува во Србија и официјално да и биде претставен на фудбалската јавност.
„Знам како изгледа да се работи во голем клуб, бидејќи дел од кариерата ја имам минато во Бриж и во Олимпијакос. Свесен сум за ситуацијата во која се наоѓа Ѕвезда, но не се плашам од предизвикот и подготвен сум да ја прифатам нималку лесната работа“, изјави Јаневски.
Поранешниот европски шампион се наоѓа во многу незавидна ситуација, забележувајќи го најлошиот старт во историјата на клубот. По три кола во домашното првенство се наоѓа на последното место на табелата, без постигнат гол, а не успеа да мине и во елиминационото коло од купот на УЕФА.