Ќе тргни работата - уште едно признание за МКД

[jotigo]

Македонија - најдобар европски економски развоен регион за 2008

Скопје, 9 ноември (МИА) - Република Македонија го доби признанието „Најдобар европски економски развоен регион за 2008“ од престижниот Меѓународен институт за транспортен менаџмент.

- По рангирањето како четврта според реформите во светот од страна на Светската банка и пофалбите за економскиот напредок во Извештајот на Европската комисија, ова е уште една потврда дека реформите што ги спроведува Владата се во вистинска насока, рече на вчерашната прес-конференција Виктор Мизо, директор на Агенцијата за странски инвестиции.

Тој истакна дека за признанието Македонија доброволно ја номинирале шест компании членки на Институтот за транспортен менаџмент што не се случило никогаш досега за ниедна земја. Наградата, како што додаде Мизо, се доделува само кога некој регион навистина ја заслужува и не се доделува по клуч секоја година.

- Со доделувањето на ова признание Институтот директно ги повикува неговите членки да ја земат предвид Македонија при носење на нивните одлуки за инвестирање. Во текот на 2008 година тие ќе вршат интензивна кампања за промоција на Македонија и самоиницијативно и бесплатно ќе ги претставуваат инвестициските можности во автомобилската индустрија во Македонија, нагласи Мизо.

Критериумите за избор за ова признание биле бизнис-климата во земјата, поволностите за мултинационалните компании, даночниот систем и даночните стапки, инфраструктурата, како и модусите за промоција на земјата пред странските инвеститори.

- Добивме највисоки оценки за промотивната кампања која оди во сите најважни весници и списанија во светот. Кампањата според Институтот е успешна пред се во менувањето на перцепциите и имиџот на Македонија што е токму она што недостасуваше во изминатиот период, рече директорот на Агенцијата за страски инвестиции.

Признанието на „Инвест Македонија“ ќе биде врачено на официјалната церемонија на 26 овој месец во Лондон.

Членови на Институтот се повеќе од 17.500 производители и сервисери од транспортната индустрија во светот меѓу кои и најголемите производители на автомобили.

Наградата се доделува веќе 30 години откако е формиран Институтот, а меѓу претходните добитници се Баварија, неколку градови во Велика Британија, како и американските сојузни држави Џорџија и Канзас