КОШАРКА - СЕНИОРИТЕ ПОПЛАДНЕВО ЗАМИНУВААТ ЗА ТАЛИН
Сега Естонија е главен соперник
Поради нивната победа во Шведска, мечот в понеделник е мошне важен
Македонската кошаркарска репрезентација попладневно заминува во Естонија, каде што в понеделник (18 часот) ќе го игра својот прв меч од дополнителните квалификации за Европското сениорско првенство во Шпанија. Од оние 14 кошаркари кои тренираат под раководство на селекторот Јовица Арсиќ, во Естонија нема да оди плејмејкерот Јане Петровски. Ристе Стефанов е повреден, но и тој ќе патува во оваа балтичка земја.
- Подготвителниот период не помина како што посакував, но доволно направивме и подготвени влегуваме во мечовите со Естонија и Шведска. Понеделничкиот натпревар добива на значење, по триумфот на Естонците во Шведска. Имаме индивидуален квалитет, кој би не' однел на баражот во Менорка. Овој меч е важен, но нема да реши се'. Ни требаат барем три победи. Мора да бидеме внимателни, бидејќи не би ме изненадила Шведска да победи во Естонија. Во принцип, ситуацијава ни одговара. Научен сум позитивно да размислувам. Квалитетот е поважен од психологијата и мислам дека можеме да го прекинеме постот на гостувањата - изјави селекторот.
Американецот со македонски пасош, Мајкл Вилкинсон, рече оти тимот е спремен, има квалитет и верува дека со тимска игра може да го освоиме првото место.
Центарот Тодор Гечевски на националниот тим му се приклучи пред три дена.
- Ми требаше одмор и затоа подоцна се приклучив. Од меч во меч ќе играме се' подобро. Доволно се познаваме и уигрувањето не би требало да биде голем проблем. Лани за малку не се пласиравме на ЕП, но се надевам дека среќата овој пат ќе биде на наша страна. Јас ќе дадам максимум, а колку можам во моментов, ќе покаже средбата в понеделник - рече Гечевски (30), еден од поискусните во нашиот тим.
Селекторот Арсиќ додава дека имаме противигра за агресивните Естонци, и тоа што имаме неколку дебитанти, не е голем хендикеп.
- Знаеме како игра Естонија, наше е да се прилагодиме. Имаме состав за агресивна игра, немаме само еден плејмејкер како лани. Јас неискусните ги гледам како помотивирани. Постарите понекогаш знаат и да ги потценуваат противниците - вели Арсиќ.
Натпреварите од групата Б почнаа завчера, со победа на Естонија на гости, против Шведска, со 57:50. Овој резултат ја прави Естонија главен конкурент на Македонија за првото место. (З.Ј.)